آمان دیر!
قاشین کیمیعاشیق لری نین قدّی کمان دیر
بس دیر! بو قَدر قدّی میزی بوکمه آمان دیر
سن سیز بو چمنزاریدهای سرو روانیم
هر سرو روان وار گوزونون یاشی روان دیر
نه بیر گول آچیر آغزینی گفتاره، نه بولبول
سونبول ساچینی یولمادا، نرگیس نگران دیر
هر بیر چیچه یی دیندیریرم غملی، کدرلی
هر غونچانی دیللندیریرم سینه سی قان دیر
هر گول دانیشیر، قصه دئییر غصه لریندن
هر لاله آچیر، سینه سینین داغی عیان دیر
هر بیر یانا گؤز گزدیریرم، چن دی، دومان دی
هر گوشه یه اوز دوندریره م آه و فغان دیر
هر قیرمیزی گول،هانسی یاشیل دونلو چمنده
سنسیز اولا خندان، گؤزومه عین تیکان دیر
سن اولمایاسان، جنت اولار عین جهنم
آمما سن ایله دوزخیمز باغ جنان دیر
گل - گل داها قورتار منی سنسیزلیلک الیندن!
قویما یانا حسرتده جانیم، قویما آمان دیر
هرچند کی ناظر قوجالیب، دوشدو نظردن
آمما هله ده سینه سی عشقینده جوان دیر
شاعیردیر اورک لرده گَزن شعر ایله با هم
شاعیر دئییلن جسم دئییل، جوهر جان دیر
ناظر شرفخانه ای