غلامعلي خان ساللانا- ساللانا حامامين پيل‌له‌‌لريندن يوخاري قالخدي. آزجا دوروخدي. نفسين تزه‌له‌دي و يئنه تكرار يولادوشدو.
آمما ايكي آدديم آتماميش ندنسه يئني دن دايانماق ايسته‌دي. بارماغين آلنينا قويدي، گيجگاه لارين اهمالجا سيخدي و قاش- قاباغين تؤكه‌ركن نئچه يول شيطاني لعن ائیله‌دي. دوز فيكر ائله‌ميشدي. يادينا گليردي كي غسل ائتمك ايسته‌ينده استبراءني اونوتموشدو. ايندي اؤزوكي پاك دئييل هئچ غسلي‌دا باطل‌دير. لاپ چتيني‌ده پالتارلاري‌نين مرداليقي و اونلاري كيرلن‌مه ميش دگيشمك ايدي.
بير نئچه آن شبهه لندي. «شايد سهو ائديرم…» دئيه ايسته‌دي اينانمايا. آمما يوخ، مطلق اينانمالي ايدي. ايسته‌دي قاييدا و بير داهادا حاماما گيره. آمما تنبل‌لندي و قاييتمادي. نييه كي هم اوتاندي و هم ده ناهار نامازين واختيندا قيلديغي ايچون ، آخشام نامازيناجان تجديد غسل ائتمگه وقت چوخ ايدي. بير داها دا شيطاني لعنت له‌دي. حامام بوخچاسيني قولتوغو آلتيندا يئر به يئر ائده‌ركن، عباسي‌نان اونون اوستونو اؤرتدي و يئنه ساللانا- ساللانا يولادوشدو.
گونش، حامامين سقفي‌نين شيشه‌لرين يامانجا قيزارتميشدي كي غلامعلي خان خزنه ايچينده، بارماقلارين قولاغينا تيخيب قُربه‌تن الي‌الله غسل ائديردي. چاليشيردي اصل‌دن فرع دن هئچ بيرين اونوتماسين. بونا گؤره ايسه قولاقلاري‌نين دلمه- دئشيگيندن توتدو گؤبه‌يي نين ايچينه‌جان باش چكدي. استبراء ائتدي. و سونرا نيت، داها سونرا دا باشلادي بيريول ساغ طرفين نيتي ايله، بير يول سول طرفين نيتي ايله… كي لعنت شيطانا …. بورنوندان قان آچيلدي.
ألين آتدي بورنونا، خزنه‌نين سويونو قاريشديردي و قانين رنگي ايتدي، و سونرا ترسه- تله‌سيگ خزنه دن چيخدي و بير گوشه‌ده حالدان گئتدي.
ائوي ياخين ايدي. اوغلونا خبر وئرديلر و اونو اؤز فيطه – قديفه سيله قورولاديلار. بورنونون قان آخماسيني بير تهر كسديلر و حامامدان چيخارتديلار.
گئجه‌دن ايكي ساعات كئچميشيدي كي حالا گلدي. قالخيب اوتوردو و آرواديندان احوالاتي سوروشدو. آمما او دينمه ميش اؤزي هر بير زادي خاطيرلادي. آروادين يوللادي تا حامام بوخچاسين حاضيرلاسين. و اؤزو تئز پالتار گئييب يولادوشدي.
شبهه‌سيز يول اوستونده كي حامام ايندي‌يه جان باغلاميشدي. باغلي‌دا اولماسايدي اونون اوزوندن بير داها دا گلمزدي‌كي اورايا گئتسين. بوگون يازيق حامامچي نين بساطيني بوسبوتون قانا چكميشدي. ناچار يولا دوشدو. ايكي- اوچ كوچه كئچه ركن قارانليق بيز بازارچادان باش چيخارتدي. بازارچادا يئرله‌شن حامامين دالانيندا، بير قوقو چيراغي پيل‌له‌لرين ديبيندن ايشلديردي و دام- دوواري اولدوغوندان داها كاس و توتقون گؤستريردي.
غلامعلي خان، حامامين ايندي‌يه جان باغلانماماسيندان سئوينه‌رك، پله‌لردن ائندي. حامامين لاپ آخيرا قالميش دللكي، بساطيني ييغيشديرماقدايدي. ياش فيطه‌لري بير- بيرينه دوگون ويريب قاپ باجادان آسيردي. ايشله‌نميش قديفه‌لري قاتلاييردي. ألده گئيي‌لن باشماقلاري كنارا دوزوب چراغ‌لاري بير- بير سؤندورروردي.
غلامعلي خان هله ايچري گيرمه ميش دي كي اونون سسين ائشيتدي:
– آغاجان حامام تعطيل اولوب!
– سلام عليكم … منيم بير او قدر ايشيم يوخدور. سويا باتيب چيخيرام.
– آغاجان! دئديم حامام تعطيل اولوب… آخي قوياجاقسيز بيز جماعتده بير راحت اولاق يايوخ؟! هرزادين بير واختي واردا، ييرمي دؤرد ساعات كي حامام اولماز.
– نييه حيرص‌له نيرسن داداش؟ سن بير چوبوق دمله‌يه نه من چيخميشام … دئيه پالتارلارين سويوندو. اؤزونه بير فيطه باغلاييب يوللاندي.
حامامين ايچي قارانليق ايدي. چراغ ايسته‌دي. دللك تنبل‌لندي و ياخينداكي قاپي‌نين يوخاري‌سيندان حامامين بير جه دانا پيه‌سوزونو يانديريب اوناوئردي.
غلامعلي‌خان، يويونان يئرين قاپي‌سي ني آچدي. بير بسم‌الله دئدي و ايچري گيردي. قورخا- قورخا گؤزلريني باشي‌نين زيرپي و تيتره‌ك كؤلگه‌سينه كي، سقفين اورتا گومبذلرينه جان بوي آتيب اوزانميش‌دي زيلله‌دي و فيكره جومدي. بيرداها يئنه اوجادان بسم‌الله دئدي و اؤزونو خزنه‌نين پيل‌له‌لرينه چاتديردي. پيه‌سوزي پله‌‌لرين اوستونه، دوز خزنه داشي نين اتگينه قويدي. بير اوووج سو مزمزه ائتدي و بير اوووج دا اوزونه ويردي. سونرا آياقلاريني يودو و خزنه‌يه باتدي. خزنه انگينه جان دولوايدي. سويودا يامان داغ ايدي. جانيني ماراقلاسورتوردي و دوغروردان كي كئف ائديردي. سو داشاركن خزنه‌نين داشين ايسلاديردي و پيه سوز اهمالجا تكان يئيردي. پيه سوزون آلاوي أييليب بوزولوردي و قره‌لتي لر، اوزانيب گوده‌ليرديلر. غلامعلي‌خان بونو بيليب آنلاياركن، ندنسه يئنه گمان ائديردي كي، جين‌لردير كي گليب كئچيرلر و‌هاواني ترپه ديب آلاوي بورجودورلار.
بونا گؤره‌ايسه آزجا دؤزدوي. جين‌لرين سس- صدا سيني ائشيدمه‌دن، اوجا بير بسم‌الله دئدي … و پيه سوزون ايشيقي سؤندي. فيكريني باشينا ييغدي و قورخونان قارانيلقي بير آن اولورسادا ياددان چيخارتدي. ايكي- اوچ يول دا أليني بدنينه سورتدو و باتدي سويون تركينه. آياقلاريني يئره قويوب بيرنئچه آن اؤزونو اهمالجا و يونگول سويون آلتيندا ساخلادي و سونورا باشي ني سودان چيخارتدي. هريان قارانليق‌ايدي. گؤزلرين اووكالادي. اهه! ندنسه هريان ياغلي‌ايدي. ديكسه‌ندي و قورخدي. و قورخولو بير قيشقيرتي‌نان نئچه يول دللكي سسله‌دي. دللك هؤله سك ايچري گيردي. هر ايكيسي دوزبير آندا تعجب له بير- بيرلريندن سوروشدولار: «پس چراغ نئج اولدي؟!» و هر ايكسي جوابدا سوسدولار. دللك گئتدي و باشقابير چراغ لاقايتيدي.
پيه‌سوز يوخ اولموشدي آمما خزنه‌نين سويو اوزه رينده، چراغ ياغي دالغالانيردي. غلامعلي خان دا باشدان آياغا، بولانميشدي ياغا. دللك آغزين آچميشدي يامان- يوغوزا كي غلامعلي‌خان اؤزونه آلمادان بير گؤز يومونجا» لاالاه‌ا‌لا‌الله دئييب ديشاري چيخدي. جانيندان، ياغلاري بير تهر سيلدي و پالتارلارين گئييب ميريلدايا- ميريلدايا گئتدي.
سحر چاغي اذان دان قاباق ايدي كي، غلامعلي خان بوخچاسين قولتوغونا ويريب عباسيني باشينا چكميشدي و كوچه‌نين كناري‌نان ساللانار- ساللانا حاماما گئديردي. اؤز- اؤزونه دانيشيردي و بللي ده دئييل‌دي كه نه دئيير. شيطاني لعن ائدير يا آللاهي مدح؟!
او هله ائله‌يه بيلمه ميشدي بوينونداكي واجب غسلي، قربه‌تن الي الله دئييب يئيرينه يئتيره.