الله

روزگار

فلکين غم و بلاسي مگر انتهاسي يوخدور؟

بير اوتانماز،عار بيلمز،نه دئييم حياسي يوخدور

بو سپهر دون و ناساز، ستمين ائديبدير آغاز

ائلمه ز حيا،اوتانماز،بيرينه وفاسي يوخدور

ائله ییب مني حواله گئنه محنت و ملاله

نه ائدیم؟بو هرزه بختين منه بير حماسي يوخدور

ستم و غمي توکنمز،اؤلورمده رحمه گلمز

بو زمانه نين منيم تک غمه مبتلاسي يوخدور

دوتوب اود گئنه آليشما،بئله چوخدا پيس دانيشما

بو سبب: سنينله آخر فلکين آراسي يوخدور

بو سؤزي دانيشماز عاقل، اولا گر بلايه قابل

سؤله‌هانسي شخص کامل الم و بلاسي يوخدور

مني ده بير اؤزگه ليلي ائله دي بو چؤلده رسوا

بو بلالي روزگارين من ايله وفاسي يوخدور

يوخ ائدن بيري نصيحت،ائله سين اونا مذمت

مگر اي منيم عزيزيم بو گونون صاباسي يوخدور؟

عجب آنلاماز ايميش سن،سبيلين آغاردي بيلمه ن

نه جهت بو شوخ و شنگين سنه اعتناسي يوخدور

بو ظريف و شوخ و شيدا،ائله دي خيال گويا

آتيليبدي باشدا بورکي اؤزونون لباسي يوخدور

دونو قالماييبدي بئلدن،شالي بئش قاريش غزيلدن

آياقيندا کفش صاغري الينين حناسي يوخدور

بونو بيل بو قدر پولسوز،پلو و پالاس و جولسوز

يئرين اولسا باغ جنت گئنه ده جلاسي يوخدور

بئليني کسيبدي قاتما،دور آياقه بوردا ياتما

ائله فيکر عؤمر کئچدي گيوون قفاسي يوخدور

ايشين اولدو ناله و آه،گذران دئييل بو بالله

داخي ايستمه بو عمري گئديب اول صفاسي يوخدور

ايشيميز عجب شولوغدور،بيري اهل درد يوخدور

بابا مدرسه گوروبسوز کي اونون خلاسي يوخدور؟

بو کدورت و ملاله آليب ايچ نئچه پياله

عبث عمري وئرمه باده،بو جهان بقاسي يوخدور

سؤله ساقيا او مهرو،سالا مجلسه هياهو

هاني مطرب غزل گو؟ نئيي نين صداسي يوخدور

تلف اولدو عمر هي هي،دور اولان اوشاقلارا دئي

هاني دنبک و دف و ني؟ نيه بس نواسي يوخدور؟

اولا گوش نه فلک کر،قالا مات چرخ چنبر

دئمه سين کسي "مغني" سسي نين غناسي يوخدور

هیدجی