بولبول
بيری واریدی، بيری يوخ ایدی ، بير چال- چپری داغيلميش، گول‌لری سولموش، آغاجلاری ياری قوروموش بير کؤهنه باغ واریدی. باغين قوشلاری بو خارابادا چوخ مشقّت‌ايله گون کئچيريرديلر. گونلرين بير گونونده بو باغا‌هاردانسا بير بولبول اوچوب گلدی و بير نئچه نغمه اوخوماق ایله باغداکی قوشلاری باشينا ییغدی. قوشلار ييغيلان کيمی‌بولبول اونلارا بير فصيح و بيليج نطق سؤيله‌دی. بو نطق‌دان قوشلار بير شئی آنلاماديلارسادا، يئنه چوخ‌لاری آلقيشلاييب « احسن! احسن » دئديلر. سونرا بولبول اؤزونون گؤزه ل ولايت‌لرينی بوراخيب بو باغا گلمه ک قصدينی بيان ائتدی و دئدی: - منيم عزيز قارداش‌لاريم! من ياشيل چمن‌لری، لاله زار گولشن‌لری بوراخيب بو ويرانه‌يه گلديم کی، سيز بدبخت قارداش‌لاريمی‌دا اؤزوم کيمی‌موسيقی ايشلرينه تانیش ائديم.هايدی، افنديلريم، باشلاياليم! بونو دئييب بولبول بير دستگاهدا جمعی موغاماتی تامام ائتدی و سونرا قوشلاریله تعليمينه باشلادی . قارغالار قاريلداشدی، بايقوش‌لار اولاشدی، ساغساغان‌لار قيغيلداشدی، سئرچه‌لر جورولداشدی، خلاصه هر قوش اؤز آناسی‌نين اؤيره تديگی سسله اوخوماغا باشلادی. بولبول نه قده ر چاليشدی، قوشلاردان هئچ بيری اونو يامسيلاماغی‌دا باجارمادی. آنجاق بيرجه طوطی قوشو اؤز عادتينه گؤره اونون تقليدينی چيخارديردی. آخيردا بولبول قوشلاردان نااوميد اولوب اونلاری طوطی قوشونا تاپشيردی و اؤزوده گلديگی ولايته قاييتدی. بولبول گئدندن سونرا طوطی قوشو بولبولون اداسی ايله بير « کونسئرت » مجليسی دوزلتدی. دعوت اولونموش قوناق‌لار همين گون مجليسه ييغيلديلار. طوطی قوشو بير اوجا يئره چيخيب کراهتلی بير سسله قارغا کيمی‌قاريلدادی، ساغساغان کيمی قيغيلدادی، حتّی قورباغا کيمی‌ده قورولدادی، آنجاق بير بولبول کيمی‌اوخويا بيلمه‌دی. سيچان بونو ائشيديب دئدی: - آی طوطی دايی! قاباقلاردا پيس‌ده اولسا اوخويوردون ، آما ايندی بولبولون‌ده آدينی بی‌آبير ائتدين و هر طرفدن آوارا قاليبسان.
یازار: سليمان سانی آخوندوو
کؤچورن: تئل‌ناز زنگانلی